香港人真係好鍾意食日本菜，陳穎妍（Anita）都唔例外，問鍾意食乜，佢諗都唔使諗即答：「日本菜！」不過日本菜都分好多瓣，鍾意邊瓣先？「靚魚生！」魚生要靚，首要新鮮，最好仲係時令㖭，不過一分錢一分貨，靚魚生唔平，食幾碟分分鐘$1,000落樓，Anita話：「只要魚生新鮮，貴一貴都食呀。」
記者：黃若茵
攝影：林栢鈞
1.時令魚生盤時價約$1,000
5款魚生包括秋刀魚、池魚、左口魚、劍魚同海螺。Anita話：「我好鍾意食切成薄片嘅左口，肉爽得嚟夠煙韌。至於秋刀、池魚呢類較腥嘅魚生，點酸汁就最夾喇。」
2.海鰻蘆笋手卷$60（左）香芒鵝肝手卷$88
餡料一肉一果，食得健康啲。比較喜歡香芒鵝肝手卷，Fusion感覺好重，味道跟紫菜醋飯勁夾。
3.歌舞伎卷$108
用紫菜捲住半生熟魚生片，入面再包住甘笋、蘆笋同菠菜，然後用天婦羅做法炸一炸，入口同時有多種口感。另附咖喱、抹茶同柚子3種口味海鹽，代替豉油，食落更香。
4.米茄子餃子$68
非一般餃子，唔用傳統餃子皮，用極薄茄子片代替，包住豐厚豬肉餡，輕輕一炸，連少食熱氣炸物嘅Anita都話正呀。
5.山葵麵豉醬燒牛柳$160
薄薄一片牛柳並未煮至全熟，肉質好嫩。面層醬料用磨碎嘅鮮山葵加入麵豉醬製成，甜得嚟不失山葵刺鼻辣味，食多幾件都唔覺膩呀。
細細個鍾情日本菜
自問唔算鍾情魚生，見師傅切咗個時令魚生盤，老實講我都數唔晒裏面有乜，但Anita一埋位就如數家珍：「呢條係秋刀，呢條係左口，嗰條呢……」佢讀書年代已經係日本菜Fans：「以前香港無咁多日本餐廳，但嗰陣我已經好鍾意食日本菜。𠵱家日本餐廳愈開愈多，菜式選擇多元化，平貴都有。如果畀得起我建議不妨食得豪啲，我覺得呢度唔算貴吖，中環區差唔多啦，一盤有齊時令魚生，份量又多，$1,000食得過呀。」除咗對食物質素有要求，Anita覺得氣氛都好重要：「我鍾意啲餐廳將燈光調校得昏暗啲，咁樣氣氛會舒服啲，無論男女拍拖撐枱腳，定大班朋友嚟食飯都好啱Feel。」
和洋料理有心思
食魚生最緊要新鮮，餐廳公關Teresa話：「我哋一星期6日都由日本入貨，每日都有飛機貨到，魚生梗係新鮮啦。」除咗新鮮魚生，見餐牌都有唔少創新菜式，原來餐廳做緊和洋料理，即係利用日本食材，但就用西式煮法同賣相，有21年煮日本菜經驗嘅梁師傅話：「其實唔少創新菜式都係由傳統日式料理演變出嚟，但我唔會刻意將日式同西式嘅材料分類，而係將各種食材嘅味道同質感自由配搭，令食物各自發揮本身嘅優點。」試過，的確有新意，經師傅解釋後，更發覺原來唔少菜式都非常精緻考心思，怪不得Anita清咗一大碟魚生之後，繼續試各款卷物無停口啦。
食客有Say
$1,000盤時令魚生，夾幾箸就玩完，斷估都唔係人人豪得起啩，食客又覺唔覺得貴？
Mandy：「$1,000食到5款時令魚生，計番每款都係百幾蚊，中環區差唔多啦。」
Tim：「我嚟過呢間餐廳幾次，魚生好新鮮，同朋友Share食唔算貴。」
Sandra：「係幾貴吓，但質素好，間中食一次OK啦。」
搵食攻略
KabukiLounge（25233006）
地址：中環蘭桂坊德己立街55號8樓
營業時間：12:00nn-3:00pm，6:00pm-1:00am，星期日休息
交通：中環地鐵站D出口
座位：104個，設有吧枱
人均消費：$250-$500
有着數：即日起至9月尾，惠顧任何Cointreau酒類飲品，即有機會參與抽獎，贏取戲飛兩張
最好賣：歌舞伎卷
