天業節水（8280）6月最低跌到1.69元，反彈受制2.325元，上月底低位見異動，成交亦明顯增多，噚日升4仙，報收1.83元，圖表上有見底迹象。
天業跌到𠵱家呢個位，高位上咗車嘅散戶四圍問意見，喺「Yahoo討論區」內，網友winningstarya問：「想請教8280，我2.4入，但一路跌到𠵱家，請問有冇人買?呀？」TIGER2887回應：「好久之前買過，要day-trade，但現在冇乜成交，高少少好走。」
近排有大行出報告，話中國正面對50年來最嚴重旱災，天業主業喺新疆提供節水灌溉系統、設計，同埋產銷滴灌膜，有概念。
香港上市嘅水務相關股份有天津創業環保（1065）、光大國際（257）、東江環保（8230）同中國水務（855），連同天業在內，呢5隻股同時喺今年6月中造咗近期低位，截至昨日收市計，上述4隻股嘅累積升幅由30至62%不等，但天業就升得嗰8%，大把空間追落後。
天業短線試2蚊應該冇難度，下一目標2.30元，短炒止蝕1.75元。
余文