立法會現任主席范徐麗泰及前任主席黃宏發，噚日一齊出席香港專業及資深行政人員協會嘅創會及第一屆理事會就職典禮，不過范太以嘉賓身份出席，發叔就響台下坐啫，而佢哋舉動亦有別。
話說發叔與別不同之處，係佢竟然手持一杯紅酒埋位，八方見佢滿面通紅，說話豪氣，知佢兩杯落肚，順勢叫佢舉杯影番幅相，佢好順攤就範，不過之後又好似有啲後悔咁自言自語：「唔知係咪李八方㖭噃？」
至於范太就話，今日先從李八方頭條知道陳鑑林想坐卿姐立法會財務委員會個位，不過佢強調呢啲嘢唔關佢事，因為佢作為主席冇投票權，亦唔係財委會委員。
之後八方問范太聽日點慶祝61歲生日？佢就一反先頭個嚴肅樣，笑晒口咁話，禮拜日已經提早同屋企人食咗飯慶祝，因為個女要去第二度，而且又同自己同一日生日，所以順便一次過一齊慶祝。