8號仔電盈上周五派成績表，盤數冇驚喜冇意外，但蘇澤光冇在公布業績後請食飯（呢個係佢習慣）就有多少意外；有人話蘇生好忙唔得閒，八方聽聞佢要北上，唔止傾生意，仲要見官。
二少澤楷本來想將電盈個固網賣畀八國聯軍，因為網通反對而觸礁，兩家反晒面；結果二少轉將手上8號仔股份（透過星洲上市嘅盈拓持有）賣予梁伯韜，不過，呢單交易其實隨時有變，變數在星洲。
在賣股之前，盈拓搞緊私有，要當地交易所、法院同股東批，但新交所一直拖延，原定上月底開嘅法院同股東會議都要押後，唔知搞乜。
就算私有化解決，賣股一事也要股東大會通過。假如二少在會上唔投票，咁就精采。聽聞有人游說盈拓大戶，叫佢哋反對賣股，如果夠票，咁梁伯韜就買唔成，8號仔繼續由二少話番事。哈，你估到時網通會唔會再睬佢，大家又點合作呢？但佢仍然係最大股東，可以話事。
呢單交易表面有結果實則有暗湧，蘇生北上，霍德東來，非為尋常事。