民建聯同自由黨上個禮拜先後上京，牌面睇，兩黨無輸無贏，至少國家副主席曾慶紅兩黨都見晒，而且都係送兩個黨八字真言，無多無少，即係無大細超，費事因為咁有人眼紅呱呱嘈。
既然牌面打個和，可以睇睇底牌邊個勁啲。民建聯獲贈嘅八字真言係「內強素質，外樹形象」，似乎係從個黨角度出發，幫手諗諗點樣可以發大嚟搞，明顯對呢個第一號愛國大黨好關心。
自由黨嘅八字真言就係「珍惜機遇，合力建港」，聽落已經覺得行貨，而且仲好似有啲責怪味道咁，唔知係咪想向去北京打小報告嘅田少講：你要幫手搞好香港，唔係叫你搞搞震。
至於餘興活動，可能係自由黨勝一籌喇，事關佢哋無啦啦獲安排到中央黨校參觀，仲可以喺嗰度打羽毛球，民建聯就無此優待，唔知係咪佢哋黨性已經夠強。
官方冇安排活動，民建聯惟有自己搵節目，譚耀宗就話，臨走前一晚佢哋去到楊孫西開嘅餐廳，唔單止食得開心，仲可以大飲特飲50年嘅茅台，不過因為有記者在場，所以都要點到即止。