國際油價跌勢未止，投資者對於美國「通脹軟着陸」愈嚟愈樂觀，至於油價跌得咁急隱藏嘅經濟衰退風險，則一於好少理，暫時擺埋一邊，唔係真係唔使驚，而係這個時候要炒上去，只講好嘅嘢，就咁樣，華爾街股市上個禮拜五又推高啲，杜指睇怕都要徇眾要求試吓11600關，即係話短期內仍有幾百點升。
港股上個禮拜彈咗上10日線同20日線，連續3個交易日好淡爭持，暫時當「造旗」睇，會唔會破旗炒上，要睇住外圍股市，而股票仍然要睇實隻滙控（005）。
滙控C輪3441：滙控嘅技術形態與恒指相近，但從技術走勢及成交變化睇，更有破旗炒上嘅姿態，上日收140.30元，升0.3%，炒上去會先試142元，破咗位會推上145元，帶個市上試高位。滙控C輪3441上日報收50仙，槓桿率28.1倍（有效12.6倍），引伸波幅15.2%，年期有212日，街貨11.1%，對沖值44.8%，轉入價內後嘅升幅會甚為吸引。正股升上142元，3441會企喺56仙樓上，正股上試145元，隻輪應該唔會低過74仙。𠵱家個價買番啲，正股跌穿139元止蝕。
大唐C輪3511：大唐（991）上日報收5.35元，升0.7%，推咗去條250日線嗰頭，若上破5.45元，會試5.80元，隻C輪3511現價26.5仙，槓桿率20.2倍（有效7.3倍），正股上試5.80元，隻輪有機會見46仙，現價買少少，正股跌穿5.20元止蝕。
俊 樺