成龍近期頻頻出動為新戲《寶貝計劃》宣傳，啱啱先至去完大馬，為咗爭取多啲曝光機會，佢連99年搞大吳綺莉個肚、生咗小龍女單嘢，都唔介意再次攞番出嚟講。
不敢面對妻子
成龍早排喺內地接受《楊瀾訪談錄》節目訪問時，自爆當年發生小龍女事件時，第一個反應就係要同林鳳嬌離婚，因為係自己做錯咗，唔敢面對太太，但係佢老婆阿嬌就好平靜，仲同佢講唔好傷害到人同佢哋自己。本來對老婆都有戒心、所有錢都自己keep嘅成龍，就即刻改遺囑，將一半身家做善事，其他就全部留畀阿嬌。
「不要騷擾我」
提到吳綺莉同小龍女近況，成龍以普通話回應話：「她們有很好的生活，就讓她們自己去過她們的生活，也請她們不要騷擾我，因為我怎麼做都會傷害到人，這麼多年，其實我也不好過。」成龍仲將呢個親身經歷告誡兒子房祖名，佢話：「挑一個好的，小心一點，這是個很重要的教訓。」該節目噚晚會喺內地嘅東方衛視台播出。
話時話，成龍喺前年為咗宣傳《80日環遊世界》時已經講過吳綺莉，佢形容自己因為飲醉酒而遭陷害，又話「我犯咗所有男人都會犯嘅錯」，惹來多方指摘，似乎應該係佢自己忘記咗呢個教訓喎。
