上個禮拜，孫柏文去咗馬來西亞吉隆坡，出席亞洲區自由市場智庫會議。喺嗰便因為一心想全神貫注開會，又面對非常落後嘅「天價」互聯網服務，所以有點「不問世事」。點知，我一離開特區基地，將《金手指》嘅防禦狀態校到最低嘅時候，一路想襲擊《金手指》嘅勢力，就「內應外合」咁發功。
曾特首贏縮輸谷
首先「內」有我哋嘅曾蔭權特首話，因為要配合最能代表「指令經濟」嘅「五年計劃」，所以要將我哋香港人多年積聚落嚟嘅血汗錢，來豪賭一番。就如當年羅馬尼亞，壽西斯古嘅仔一樣，可以喺蒙地卡羅嘅賭台上，輸完可以再輸。噚日搞個「廸士尼」，今日就「昂坪360」，輸咗？Noway！有賭未為輸。一日曾蔭權仲係特首，一日香港人仲有最後一滴血、最後一滴汗，曾特首仲可以「贏縮輸谷」，繼續「追」。
雖然，上期幫香港人押重注賭「高科技」、「旅遊業」等等嘅戰略性工業失敗，不過可以報仇，今期就賭落其他嘢度。好在曾特首搞「指令經濟」有經驗，例如，利用Enron式嘅會計原則，將真正成本掩飾。不過有效地掩飾成本都未足夠，最緊要係千祈、千祈、千祈唔好講「效益」。
例如，搞「廸士尼」，好在係「廸士尼」預測入場人數，唔係曾特首。如果係「在爭取連任」嘅曾特首預測入場人數，又碰正唔夠數，曾特首就會開動政府嘅「強迫人民」機器，要求湊夠數。例如，可以強迫公務員放假一定要去「廸士尼」，如果你嫌手段太強硬，政府又可以「紓緩」公屋居民為名，免費畀公屋居民去「廸士尼」。再唔係可以增加區議會撥款，等班區議員可以帶街坊去「廸士尼」玩。最終極當然係宣布「將廸士尼由牟利生意，變成非牟利社區設施」。手段層出不窮，我哋呢啲希望可以做「終極世界仔」接班人的人，真係需要多多學嘢。
央行打壓貴金屬
講完對付《金手指》嘅「內憂」，就要講「外患」。孫柏文亦要除下「積極不干預」fan屎嘅衣服，換上戰衣，搖身一變、變成各位《金手指》fan屎好耐冇見嘅「白銀文」。上個禮拜，各國中央銀行為首嘅「紙幣狂魔」，喺不出五個交易日，出招打壓黃金、白銀。一班冇聽「白銀文」忠告買實貨白銀，而係走咗去借錢做「孖展」炒白銀嘅烈士，咁就犧牲咗。
睇番白銀，銀價又跌番落去佢嘅200日平均線。我曾經多次講過，如果大家想喺原材料大升浪當中搵錢，最好嘅入市時間，就係原材料價貼近200日平均線。所以今日我就用番以前做股票分析員時候嘅術語，「重申目標價」。下面有個銀價圖，相信大家睇完就會知點做。聽日再討論近期白銀同埋其他原材料嘅走勢和展望。
（重申）建議買入：白銀
目標價：每盎斯120美元
年期：至到2016年3月6日
孫柏文