受內地宏調打擊，馬鋼（323）股價今年4月由3.35元高位直插至上個月頭低位2.25元，反彈動力一般，直至上星期五，終於有啲睇頭，以較大成交升穿近期阻力位，以全日最高位2.55元收市，升9仙。
馬鋼近3個月組織過幾次反彈，可惜次次都令捧場客失望，對於今次反彈，「香港討論區」嘅網友SkinnyBoy唔敢抱太大期望：「之前跌咁多，𠵱家升番啲……應該，但每次差啲返到故鄉時，個艇又飄番出海，所以依然坐艇中」另一網友yylam713比較好彩：「我噚日$2.48買咗，大陸鋼材價格近期升咗好多。」boxerhong回應：「收息都喺番度，如果唔係高位買入，323真係好好息。」
馬鋼上月初公布中期大跌49%，主要係第1季盈利跌得多，第2季隨住鋼鐵價格回升，盈利已大有改善。近期鋼價持續上揚，加上鋼鐵業有併購概念，馬鋼又屬於高息股，夠吸引力。
技術走勢方面，馬鋼上周升穿近期雙頂阻力，MACD重上0線之上，保歷加通道收窄後撐闊，RSI亦突破降軌，相信今次真係嚟料，第一個目標睇2.70元，整固後上試3蚊，跌穿保歷加中軸2.46元止蝕。