我求大俠早前咪講過，巴西翼鋒丹尼臣去咗英超樸茨茅夫試腳，但最後都冇被錄用，丹尼臣終於去咗沙地阿拉伯，同之前傾掂數嘅球會艾爾尼沙正式簽約。不過丹尼臣今次去沙地唔係掘金㗎，據報佢年薪得嗰120萬歐元（約1,200萬港元），除番嚟計周薪17,000鎊都唔夠，連英超中型班好似雷丁同韋根啲冇乜名嘅球星，隨時都搵得多過佢。
樸茨茅夫試腳唔掂
聽講今次丹尼臣冇得去英超發展，同樸茨茅夫嘅助教阿當斯認為佢不復當年有關。呢位前阿仙奴隊長就話丹尼臣名氣就夠晒大，但係水準已經唔係當打時候嗰皮，免轉會費都斟唔過。阿當斯話有大把好球員嚟到樸茨茅夫試腳，仲好吹水咁話有啲級數達到國米中場韋拉咁高喎，唔怪得丹尼臣冇運行。
老實講，29歲嘅丹尼臣都未到掛靴年齡，曾經打破最高轉會費紀錄嘅佢，𠵱家淪落到一個仙都唔使，連歐洲聯賽啲球隊都唔吼佢，搞到要去沙地咁遠，人工又唔係高，都咪話唔坎坷。不過話時話，丹尼臣本身都係皮膚黝黑，留埋啲鬚分分鐘同沙地球員冇乜分別，話唔埋丹尼仔同隊友好啱傾，喺當地掛埋靴吖笨！
「都係嗰句，現實係極度殘酷嘅，丹尼臣冇喺當打嗰陣把握機會表現自己，喺西甲貝廸斯又成日受傷，搞到淪落到沙地阿拉伯，命水呢家嘢要信㗎。」