快將嚟香港上市嘅全國最大銀行工商銀行，舊年底總資產值6.45萬億元人民幣，咁大銀碼好難明，即係幾多？即係香港外滙儲備嘅6倍幾咁上下啦。
雖然話工行資產多，比起滙豐控股嘅1.74萬億美元(13.83萬億元人民幣)，仲差成半；不過，身為滙控集團總經理嘅邵銘高就預言，未來10年之內，全球十大銀行之中，就有一家係中資銀行；再過多10年，全球五大銀行之中，有兩三家中資！咁前瞻性嘅言論，華華當然要問清楚佢，究竟睇好邊家。點知佢拋番個波畀華華，仲賣關子話，等你自己去發掘啦！
早前滙控公布業績時，總資產已經增加至1.74萬億美元，超越花旗嘅1.63萬億美元，躍居至全球資產最高銀行。資產超過1.5萬億美元的金融機構，暫時只有滙控、花旗、東京三菱UFJ。