枱頭剪報舊雜誌堆積過高，於是展開清理大行動，清得咁上下，FCC（外國記者會）嘅雙月刊（七月八月號）浮現眼前，見到封面係陳方安生，於是揭多一次，先至發覺內裏有幾頁係彭定康辛辣言論（barbs）摘錄，睇落十分過癮，唔記得有本地報紙報道過。彭定康喺七月二十四號到FCC舉行晚餐演講，推銷佢本大作《NotQuitetheDiplomat》，餐券唔夠半個小時就畀會員訂晒，左丁山收到FCC傳真通知之後立即打電話，已經知道「向隅者眾」，無緣參加。
彭定康對住西方記者，特別多嘢講，吃完晚飯再到FCC地下酒吧與一眾外國通訊員飲酒，極為高興。據記者VaudineEngland記述，彭定康如是說：
中日：「中國在二十世紀頭五十年，處境艱難，既有內戰，又有日本侵略，日本行為惡劣，歷史已有記載，但𠵱家日本唔認。」
英國：「英國於十九世紀在中國嘅活動並不光榮，但我哋在香港確實有好多好事做過。」
劉慧卿問及福克蘭與香港之分別，彭定康答：「香港過往有唔少擦鞋仔，向殖民地祖家獻媚，佢哋話唔需要理會本地啲民主派；到咗九七問題浮現，我哋外交部認為要睇全面大局（即係中國），如果我哋畀香港更多民主，中國當局會誤會我哋鼓勵香港人搞獨立所以簽咗聯合聲明；後來有人全新詮釋聯合聲明，總之progresstowarddemocracy（向民主方向進展）淨係講進展，唔會講民主！」
香港未適合有民主：「香港大概係唯一一個有自由、冇民主嘅地方，唔通你認為星加坡更自由咩？香港應該有一個參與性嘅政府，但前幾日有啲儍瓜（somejerks）講及香港未適合、未準備好，唔係啩，點解印尼適合、馬來西亞適合、菲律賓適合，而香港未適合？呢啲講法完全混賬（completenonsense）！」
GST：「有民主去推銷不受歡迎之事已經好難，冇民主而去推銷，更難！祝亨利好運。」