立法會每年暑假復會前，都要象徵式搞搞選舉，推選一吓各個事務委員會嘅正、副主席。點解話象徵式？因為好多事務委員會主席個位都係協調出嚟嘅，總之正、副主席每人輪流做兩年，有規有矩，唔使大家爭一餐。但係財務委員會個位就比較特別，由於位高權重（揸實政府盤數喎，真係唔嘢少㗎），所以好難傾掂數，惟有次次拗手瓜選過。結果做事爽快利落又勤力嘅卿姐上次就脫穎而出，而且好評如潮；卿姐當然想冧莊，但又有傳政府要倒劉，搞到卿姐要向煲呔同唐唐大興問罪之師。
話說最近政界有一種風聲，就係話煲呔同財爺，都想支持一個親政府人士做財委會主席，等卿姐今年無得再玩。至於呢個人係邊個？咪就係𠵱家嘅財委會副主席、民建聯陳鑑林囉。
呢個傳聞傳嚟傳去，最終竟然傳番去卿姐耳仔度，卿姐咁大情大性，無明火起上嚟，梗係即時撥個電話，向唐唐同曾俊華查詢，問佢哋因乜解究要倒自己，最唔啱就係插手立法會事務。
表現令各大黨拍手掌
點知兩位阿哥都呼寃話「無」噃，卿姐先至鳴金收兵。卿姐同八方解釋話點解咁勞嘈，唔係因為驚住個位無咗，而係覺得政府唔可以介入立法會選舉，尤其更加唔可以支持任何人㖭啦，咁樣做真係好離譜。既然政府話無咁嘅事，自己都只可以信住先，唔係可以點？
咁究竟卿姐𠵱家夠唔夠票？卿姐唔知係咪謙虛得滯，話至今只得泛民主派話支持自己。至於自由黨同泛聯盟就未話挺唔挺喎。有民主派中人都實牙實齒咁話，有人同陳鑑林拉緊票㗎，而且呢個消息都傳得幾厲害吓，空穴來風，未必無因。
以八方所知，立法會各大黨派都對卿姐嘅表現拍晒手掌，好多人私底下都話會支持卿姐連任，事實有佢守龍門，一定為納稅人慳番好多錢。如果陳鑑林真係要由阿二做阿一，如果唔係有政府大力支持，就係因為民建聯覺得啲重要嘅位（如財委會、內會同帳委會）都冇份坐正，所以一定要搶番個先甘心。
卿姐會唔會陰溝裏翻船，10月6號就自有分曉。但有人提醒八方，如果陳鑑林真係越級挑戰成功，佢𠵱家坐住個房屋事務委員會主席位，係咪又可畀番阿達仔坐呢？因為佢唔可能一人坐兩個主席位，破壞規舉，好大件事。