煲呔就話忘恩負義，將恩師郭伯偉同夏鼎基嘅積極不干預政策拋諸腦後啫，為23條擋晒箭嘅葉劉淑儀又點會咁唔尊師重道吖。
今個星期，葉劉喺史丹福大學嘅畢業論文導師、政治學權威學者LarryDiamond到訪香港，葉劉就會出席恩師唔少活動以示支持。
唔知係咪想提醒市民，自己係Larry嘅得意門生，所以葉太噚日終於發表佢嘅碩士論文，無論內容係點都好，至少又可以搶啲鏡見見報。
葉劉喺佢篇題為《香港：過渡中社會民主發展的個案研究》嘅論文中，建議立法會一旦由普選產生，當中一半議席要由地區直選產生，另一半則要各大政黨提出參選名單，再由全港市民投票定高下，換言之每個市民可以投兩票，而特首則可以由立法會嘅多數黨推舉。
葉劉覺得呢個制度最好之處，係可以確保政府政策喺立法會內有足夠票源，同時又可以促進政黨發展，仲話已經將建議交畀政府考慮。咁嘅機制下，如果葉劉真係入到立法會，特首都有佢份做呀。