行會成員夏佳理噚朝上電台，佢開口埋口都力撐銷售稅嘅諮詢，認為唔可以話有另外方式開源，就傾都唔傾喎。
唔經唔覺，夏叔入行會快一年，佢話，𠵱家做特首顧問好難，因為市民對政府嘅期望高咗，政黨又成熟咗，要得到佢哋嘅支持同共識一啲都唔易。佢仲笑自己可能一早洞悉天機，知道立法會會愈嚟愈複雜，所以提早離場。
雖然大家都寄望夏叔可以用佢嘅政治智慧，拉近行政立法關係，但係實際上佢嘅前黨友自由黨都好難搞，成日要分權，真係急都急唔嚟。「搞親疏有別俾人鬧，冇親冇疏又冇票邊個同情你？」
夏叔話冇諗過2012可否有雙普選，不過，聽落搞特首直選易過立法會，因為好難叫啲功能組別自殺。至於選委會，夏叔轉咗去法律界做選民，佢話係因為自己唔再係地產界代表。問佢去唔去選做選委？佢又係話冇諗過，即係煮到嚟先算。法律界有20個位，選民七千多，夏叔話有經驗冇着數，法律界都係傾向年輕人世界，如果企出嚟選，都要預咗未必贏梗。