前幾日喺公司Pantry食沙律，同事炳哥入嚟，喺雪櫃冰格攞咗包嘢出嚟，原來係用膠袋同報紙包住嘅手機電池。我望一望炳哥，心諗唔通佢呢排成日去澳門「食叉燒飯」，輸到儍咗？佢知我諗乜嘢，就笑笑口講：「我聽人講將舊電池用報紙包住，再放入膠袋，擺喺雪櫃冰格三幾日，之後可以用耐啲㗎。」
呢個「電池回魂大法」咁神奇？後嚟港大電機及電子工程系副教授林皇興同我講，呢個方法不無道理；因為電池裏面嘅正、負極分開，會產生電力，但電池用耐咗，正負兩極會容易混淆咗，甚至混埋一齊，嚿電壽命就會縮短，用無耐就要再叉電。
容易受水氣入侵
佢話雪櫃冰格可以冷卻電池入面能量嘅活力，減低兩極嘅混亂，延長舊電池壽命。不過佢話就算包住嚿電，雪櫃嘅水氣好容易入侵嚿電，導電嘅水會令兩極更加混亂，電池仲好易壞㖭。
我前日返公司諗住同炳哥講，點知佢話：「嚿電同手機我都丟咗，換咗部NokiaN73啦，4,000幾蚊之嘛。」咁豪，唔使問都係喺「馬交」有斬獲啦，睇嚟佢碗叉燒飯真係愈食愈大碗喎。
逄周一至周四刊出