影音試團：第二代BRAVIA藍天行動　無敵海景掛上牆

香港地居住環境狹窄，連特首都疾呼話要搞「藍天行動」改善生活環境，雖然想擁有一個無敵全海景環境難度極高，不過憑住SONY新一代嘅BRAVIA登場，將高解像全高清靚景呈現眼前，加上繼紅、綠色作出優化後，連藍色表現都得到提升，52"型號掛上牆後，簡直就如喺牆度「開」多個靚景窗口，望得多真係人都醒啲！
記者：許福合
攝影：楊錦文

終於支援全高清

SONY剛喺日前舉行發布會，展示最新嘅BRAVIAX系列，新機淨睇個樣已經夠晒特別，四邊用上懸浮玻璃設計，整體觀感營造出更薄更纖巧嘅錯覺，唔似其他牌子LCDTV咁冷冰冰，勁有Style！
新系列暫推三種屏幕尺寸規格，包括40"、46"或52"，暫時未見有最普及嘅32"型號。較特別係連框架都有6種顏色畀你揀，當中包括黑、白、銀、啡、藍同紅選擇，襯家具一流！
講到X系列重頭戲，梗係SONY第一款行全高清嘅LCDTV，解像度達1,920×1,080，接駁高清影碟或DV，可發揮超細緻嘅畫面表現，從現場幾段海景影片示範睇，真係每個波浪都睇得清楚！配合年尾陸續登場嘅Blu-ray播放機同PS3遊戲機，SONY高清家族終於齊人。

■對應FullHD，令遠近花花草草都可以「逐朵」數番出嚟！

■新BRAVIA中以支援全高清嘅X系列最搶鏡。

52"（售價未定）
46"（$45,800）
40"（$35,800）
10月尾推出

連藍色都作出優化

最鍾意挨喺窗邊睇海景嘅Clara，估唔到對住呢個XLCDTV一樣照挨，因為X系列使用嘅S-PVAPanel，具備178°可視角度，就算打側啲睇都可以見清畫面！第二代嘅寬色度亦作出提升，相比第一代，除紅同綠之外，新型號連藍色都得到優化，能顯示更具層次感嘅藍色，加上紅、綠同藍本來就係三原色之一（RGB），換言之顏色後續變化同配搭都會大大提高，視覺上比舊有嘅S同A系列更為豐富吸引。睇戲或睇海都一樣，要有現場感先會覺得好Feel，而X系列本身就已經具備ProLogicII環迴立體聲，就算得兩邊喇叭，都可營造環迴立體聲，唔駁5.1Hi-Fi都可有靚聲享受！