當距離法國巴黎車展舉行嘅日期愈來愈近，各大車廠所發放出嚟嘅新車News都愈來愈多；其中屬東道主嘅Renault車廠，喺最近都公布咗新款Nepta概念跑車嘅News，勢要吸引Fans留意咁話。
GT跑車造型煞食
講真，RenaultNepta概念跑車嘅Design真係好流線型，好有GT跑車嘅Style，雖然車頭個Design好簡單，無咩複雜嘅設計，但一對LED頭燈都幾靚喎，襯埋闊大鬼面罩，望落都OK㗎！但俾我揀，反而會覺得佢車門Design好掂，開咗之後好似鷗翼車門咁，從正頭同正尾望埋去，個Look登時型好多。
椅背內藏DVD屏幕
車廂設計同部車嘅外形一樣，都係Sell未來概念化，經過特別設計嘅錶板同座椅編排，令你坐進去後有濃厚嘅跑車感覺，仲有好強烈嘅CyberFeel；但最正都係佢嘅椅背，喺印有Renault廠徽嘅透明蓋下，原來內藏DVD屏幕，勝在實際。動力心臟則係一台3.5公升V6引擎，馬力輸出可高達420匹，配以7前速半自動波箱，0至100km/h都只係4.9秒，快！記者：鄭達基