廉政專員黃鴻超的確有口齒，佢一上任就話過請八方食餐晏，日前終兌現，去咗廉記食飯。唔講唔知，原來啲官員好有規有矩，一般午飯請客，每人上限為250大元，晚飯就多啲。咁老廉啲咖啡就唔好搞喇，喺飯堂食飯都OK。
其實八方唔係為食，只係怕專員調咗位就冇機會，早前成日傳佢上個月任期到會由羅范接棒，點知最後煲呔要佢再坐一會，坐到幾時未知，不過相信一定等唔到間廉署新大樓落成啩。
話說間座落喺北角渣華道嘅新大樓喺舊年一月動土，𠵱家一切按進度，已經七七八八，明年下半年完工應冇問題，到時黃專員可能已經做緊某個局嘅常秘。究竟係重返保安局抑或同Fanny對調，去做教統局，八方唔知，因為黃專員好口密，無從打聽。
講番間耗資7.3億元，高25層嘅新老廉大樓，裏面有好完善嘅裝置，有訓練學校、多用途訓練室，仲有室內射擊場，等啲陀槍同事可以有自己嘅訓練場地，燒番幾槍，諗吓都幾好玩。