上星期五，新世界發展主席鄭裕彤（彤叔）喺上海開完恒生董事會後急急腳走，連打波都唔去。點解彤叔要咁趕呢？咪就係要出席大仔鄭家純喺北京順義天竺區搞嘅活動，推出豪宅「麗宮淺水灣」同「麗柏公寓」囉。
麗宮淺水灣屬於罕有嘅水岸別墅豪宅，並會分兩期推出，預計07年下半年入得伙。
內地近期不斷宏調，打壓豪宅市場，仲規定超過七成以上嘅新盤，都要發展中小型住宅單位㖭，自己集團有豪宅賣，彤叔自然唔會倒自己米，佢接受有線電視訪問時話，呢個政策執行上會有一定困難。「呢樣嘢冇可能得㗎，因為點解呢，每一處地方，每一處例唔同吖嘛！」
今次北京之行，彤叔除咗力撐大仔外，仲去咗一間跑車維修及銷售中心嘅開幕儀式。
測量師學會最近提出統一樓面面積計算方法嘅建議，身為地產商嘅彤叔竟然表示歡迎喎！
「我認為好合理，因為你譬如（層樓）1000呎，賣到1500呎咁，就變咗有欺騙成份啦！大家若果統一計法，我認為相當之合理。」彤叔仲話，睇好香港樓市，將會穩步上升咁話。
𠵱家十大地產商之一嘅新地，表咗態話「歡迎」，唔知其他點睇呢？