交通銀行行長個位懸空咗差不多成個半月，到上星期三（9月13日）先公布李軍上任。最近出版嘅《財經》雜誌就報道咗呢位新行長點解要咁耐先誕生到，仲話畀你知出生過程。
事關今年交行選行長，簡直就係可以用「破天荒」嚟形容，因為行長係透過一人一票競選出嚟㗎。凡係交行部門主管、分行行長以上級別，就有被推選資格，不過都要合乎幾個原則性條件，包括年齡、學歷、管理經驗同道德操守等等，提名範圍仲不限於交行內部。於是，內部笑稱呢個選舉似「海選」。
8月初，差唔多80個分行行長同部門主管，齊集上海交銀大廈，參加呢個一人一票、不記名嘅選舉。結果，就喺得到內部投票結果，加埋銀監會同央行等監管部門嘅意見後，敲定李軍做現任行長。