關仁以前聽聞缺德打仔嘅辦公室有個密室，佢周時開開吓工，會要求女主角同佢入去開心吓，點知開工期間梳乎嘅習慣，到𠵱家都未改。話說缺德打仔早排拍緊戲，某日開工開到一半，佢老友富商突然來電，話安排咗兩個泰國妹畀佢，仲送到去門口，缺德打仔起初都有推，話開緊工走咗去唔係幾好，但富商猛推銷話兩條女好正，唔試唔得。缺德打仔色心一起，就乜都唔理走咗去，起雙飛兩粒鐘先返，再開工都已經冇晒精神。
名媛有愧任老公滾
今時今日都仲風韻猶存嘅名媛，同佢老公嘅婚姻向來都唔係咁美滿，原來佢未嫁之前，同老公嘅兄弟、老竇都有過一手，佢老公娶咗佢好耐之後，先至知道佢嘅歷史，真係啞子吃黃連，有苦說不出。後來仲搞到心理有問題，惟有成日喺出邊搵其他女人平衡吓，名媛心中有愧，對於老公去滾，當然係隻眼開、隻眼閉啦！
癩痢頭私竇解放
男歌手癩痢頭出道以嚟行創作路線吸引fans，關仁都覺得佢某程度上幾有才華嘅，只不過佢成日假正經扮怕醜仔，關仁就忍唔住打冷震囉。癩痢頭之前被影到同細細粒有路，把口就死撐冇事啫，實際上佢都擔心fans對佢冇幻想。所以呢期佢就醒啦，為咗去蒲，索性玩唔瞓，專揀埋凌晨四點打後嘅時間，同大班同佢差唔多打扮嘅abc竹升幫聯群結黨，幫襯中環或銅鑼灣上樓酒吧私竇入面嘅VIP房，劈酒猜枚媾女全攻略，全部喺密室一條龍進行，一出房門就各自散水，確係識得善用空間兼爭取時間。
Textby關仁