很多樂壇中人都說黃貫中（Paul）臭寸、麻煩，但你有你講，阿Paul依然故我，說話一針見血。雖然他的話不會人人啱聽，但句句有point是事實，言之有物、話中有骨，這塊老薑令人辣得標汗。
訪問中曾經出現的三個話題，隨口拈來，阿Paul的答案也精妙無倫。
話題一：本地樂壇—「買嚿豬肉臭嘅，用啲乜嘢川椒炒，側邊啲人都會覺得臭。」
話題二：本地歌手—「佢哋係混賬、混水摸魚、魚目混珠、混蛋，加埋就係混。水中『昆』人，混字有三點水為之錢，『昆』人啲錢。」
話題三：女友朱茵—「冇愛情即係餓死，冇女人世界末日。」
Paul下月紅館開騷前，請他先開金口熱身—黃貫中有碗話碗talkshow，現在開始。
撰文：朱倬誼
人要年年驗身，Beyond成員黃貫中眼看樂壇，早年在他口中已經敗壞不堪，今天請他再update，他的看法依然不變，只是撞得板多，他今次不開名而論，因為大家都要為兩餐，畫公仔不必畫出腸，精明讀者自有判斷。
自比是娛樂圈局外人的阿Paul，對本地樂壇抱着哀莫大於心死feel，臉上掛着有點嘲弄但又無奈的苦笑，他說：「問吓普羅大眾咪知乜事，尤其望到一班喺度混嘅明星，唔需要再講傷害說話，都係嗰句：搵兩餐啫。大家都知混嗰班唔會長久，唔會有唱片市場，無論佢鋪足金又好、鍍金又好，搞演唱會都冇人睇，買嚿豬肉臭嘅，用啲乜嘢川椒炒，側邊啲人都會覺得臭。」
睇好at17周國賢
但阿Paul也看好一班新人，他說：「咁我發覺香港都有好多好嘅，有啲對音樂有心，但實力未夠，at17、周國賢都跑緊長途賽，我同佢哋冇利害關係，唔係好熟，但欣賞佢哋打正旗號，even許懷欣都係；香港一班地下樂隊捱得好辛苦，每個都有份正職至支撐到樂隊，唔係為生活，係為理想。」
問阿Paul何謂混？他像《每日一字》般解釋，但答得抵死之極：「我所講嘅混，係混賬、混水摸魚、魚目混珠、混蛋，加埋就係混，水中『昆』人，混字有三點水為之錢，『昆』人啲錢。呢個圈好混，80年代試過唱片公司出14個月糧，我哋賣七、八萬張靠邊站，Leslie（張國榮）、阿倫賣幾十萬㗎。未來唔會再有呢個情況出現，因為我哋冇根─冇文化根、鑑賞力嘅根。」
「死路都要行住先」
阿Paul的話令人聽到打冷震，這樣說來，娛樂圈和死路一條都差不多了。他說：「死路都係路，行住先，都會開開心心行呢條路，哪怕是死路？我願意用鐮刀割一條路畀自己行，咁多年嚟我都係一手一腳，之前啲唱片公司俾我鏟到飛起，個個見到我都話阿Paul好『擇使』。當日俾我話過嘅人消失晒，我仲喺度，因為我一早講過『我一定耐過你！』唔好話我黃貫中講嘅嘢係啱定唔啱，我仲彈緊band，仲可以大大聲聲，唔係賺好多錢，但街坊話：『喂，Paul，開騷呀？支持你呀。』好多謝。做人，為呢一刻都已經夠，音樂做到認同，好好啦。
「我本身個人灰色，悲觀到盡咗，已經睇到化，但積極面對，好似掟一隻歌出去，要三分幾鐘最好（編按：符合電台要求的播歌時間），我就掟隻六分幾鐘嘅出去，鍾意聽唔介意多兩分鐘，唔鍾意就一分鐘都唔願聽。做人一定要有自己宗旨，幾十歲啦，唔需要聽啲根據人哋講嘅嘢，唔使人哋指指點點，因為最後會迷失自己。」
「個個去蒲去媾女」
阿Paul續說：「人好怪，好易俾勝利沖昏頭腦，好易利慾薰心。知名度、喝采聲會上癮，因為知名度而去做冠冕堂皇嘅嘢，虛榮會令人中毒，一經上癮戒唔到，尤其成功咗嘅更加要檢討，賺到錢嘅就更加要有使命感，淨係識得拍枱鬧經理人，點解人有嘅嘢我冇，點解播佢啲歌唔播我啲歌，係時候去檢討自己囉。現實係好現實，唔係殘酷。
「我自己都攞過獎，每次都唔好意思攞，池中無魚蝦稱王，我有好多不足，但鬼叫冇人玩呢啲嘢咩？個個去蒲去媾女，有冇人睇到我苦練吖？手指開晒花呀，啲人話：『你講嘢好寸喎！』我有好多嘢係練番嚟㗎，黃貫中唔係一個天才，某程度上我係庸才，細個時，我已經知道要比人成功，就要比人加倍努力，我生得矮，唔係靚仔，好似龜兔賽跑隻龜，呢個就係事實。」
攝影：仇志德 化妝：HettyKwong
髮型：KK@Headquarters
