貼近香港嘅擔桿島海域，前晚發生黎克特制3.5級地震，雖然只係輕微震動，但敏感嘅香港人，即成驚弓之鳥，有樓一族嘅網民，甚至在網上掀起討論︰地震震冧樓，究竟保險有冇得賠？使唔使繼續供樓？
tommythumb係《香港討論區》上，就好肯定咁話︰「你有冇買地震險？冇，咪冇得賠。香港供樓多數只買火險。」網友dbp亦認為︰「一般保險唔包天災，有啲貴plan就包少少，要睇清楚。」fei9966聽罷，即時好心灰咁話︰「地震係天災……咁……死得！」
至於kitty反而關心如果真係地震冇咗層樓，重使唔使供？30mething妙語如珠咁回應︰「如果真係冇咗咁激，咁你做mortgage間bank都可能會冇埋。」benleung12也加把嘴︰「到時整個香港都totalloss，死很多人，死剩嘅銀行員工都唔返工，邊個追你。」
記者曾經問過銀行界朋友，佢話其實𠵱家大部份嘅樓宇火險，保障範圍都包括火災、爆炸、颱風、地陷、空難、甚至地震，承保公司會承擔投保人重置物業所需嘅費用，賠償額就視乎投保額而定。至於冇買火險嘅業主，如果不幸喺地震中冇咗層樓，咁又係咪仍然需要供樓呢？銀行朋友話，理論上係需要，但都要睇埋業主立案法團有冇為成座大廈買保障，所以好難一概而論。
不過，記者始終認為，香港發生大地震嘅機會真係微乎其微，反而發生樓市大地震嘅機會重大！
hitrate指數：539次
報料電郵：[email protected]