奧瑪花曼（UmaThurman）自從同影壇鬼才昆頓塔倫天奴（QuentinTarantino）合作完一分為二嘅《標殺令》（KillBill）之後，都冇乜突破性嘅新搞作，似乎佢要喺荷李活殺出血路，都係要做番啲騎呢惡死同好打嘅角色，呢套《超女．強勢回歸》（MySuperEx-Girlfriend）就係為佢度身訂做，奧瑪喺片中扮演嘅女超人唔只玩殘花心男友，仲奉旨要玩謝大家熟識嘅美國漫畫英雄超人㖭！ 撰文：戶川淳
繼6月雷聲大雨點唔夠大嘅《超人強戰回歸》（SupermanReturns）後，今個月28日就輪到超女中秋發威！單睇《超女．強勢回歸》個戲名已經玩嘢到爆。
招數夠誇張
呢套片係講奧瑪表面係鍾意扮靚嘅普通紐約女性，遇上路克韋遜（LukeWilson）呢位普通紐約男性之後，就同普通男女一樣互媾、拍拖、分手，但其實奧瑪係一位有超能力但佔有慾極強嘅女超人，佢受唔住俾人飛嘅打擊，於是向花心前男友作出大報復，招數包括掟條鯊魚去咬佢以及一拳打爆佢架仲未供甩嘅跑車，簡直夠晒誇張。
扮演被糟質男友嘅路克韋遜，中年發福兼有個大肚腩，吸引力麻麻，反而演過《六呎風雲》（SixFeetUnder）同埋美國版《TheOffice》、個樣十足安德尊咁靚仔嘅雲尼韋遜（RainnWilson），喺片中做路克軍師，發揮搞笑本領，非常搶鏡。
玩寸超人片
套片導演艾雲列文（IvanReitman）曾拍過《捉鬼敢死隊》（Ghostbusters）系列同《地球再發育》（Evolution），梗係大玩特玩，仲要係玩謝超人故事為止。所以你會睇到超人飛上天同其他超能人喺曼哈頓空中大戰。片中仲學似超人交代超女童年，笑死！作為一部「完美」超級英雄片，又點少得一個超級大反派？超女都有個死對頭，叫拔林教授，又係財雄勢大作惡多端，問你死未！