為咗考吓自己心水，我都會落吓注，呢場買啲，嗰場又買啲，聽落好似好爛賭咁，但我嘅注碼唔大，幾十蚊而已。
落注前，我都會先睇吓師傅點貼。邊個係我師傅？舊年公司安排我同阿占兩個新人拜「盤神」為師，有睇過球彩台嘅，都知「盤神」係根據盤口同飛數變化，去俾心水同貼波嗰位神秘人，從來唔露面，出鏡佢都俾塊半透明膠板遮住，螢幕前只係見到佢個影。我喺節目度都唔敢同佢打對台，因為通常都冇運行。
唔少人都問我師傅到底係邊個，我梗係唔會話畀你哋知啦，呢啲係球彩台高度機密。有球迷會覺得，踢波梗係睇實力，無理由睇飛數，應該以實力分析去估波。起初我都以為係咁，但做咗節目之後，知道有時比賽會牽涉人為因素，所以並唔係純粹踢場波咁簡單。
今晚撐愛隊曼聯
今晚兩場嘅英超大戰就一定嚟真，尤其曼聯對阿仙奴，兩隊視大家為死敵。不過，就算師傅點講，我都係唔理飛數，今晚喺節目度一定撐自己愛隊曼聯！
WENDY
由歐國盃EuroBabes，變身球彩台受歡迎主持。