招行前晚（美國時間中午）公布分餅仔結果，由於事先張揚只得88萬股派畀散戶，所以大家最關心係究竟科咗水有無貨收，最新消息話好難以做到一人一手，最多認購十手先至有一手。喺《香港討論區》度，有唔少網友都好失望，話衰過之前中行，如果今次抽唔到，惟有寄望工行。
網友MT話：「有幾好？1:10，當佢升20%，個本先係升2%。扣手續費1%，實得1%profit，Wastetime。」良丙建議，「如果一手都無，打電話返大陸，叫人剪咭轉銀行。」不過，leucocyte就話明「好鬼憎一人一手，借咗孖展個啲咪好唔抵。」
童話騙人亦話，「好鬼憎一人一手，令啲盲毛都有錢賺......toobad......」，有理由推斷兩位應該係借孖展入貨的大戶！
童話騙人講到咁，當然即刻俾版友狂插啦！ching513話，「唔好咁講......有錢你又賺唔晒......況且人哋又抽，你又抽......人哋係盲毛，你係咪咩毛??」dicehoo更火爆，佢話「你咁叻咪去叫UBS同JP唔好分畀啲老散囉，你咁有錢咪去Morgan同高佬度開個戶口再去抽b組......」
另外，討論區度亦大把人估招行首日掛牌升幾多，普遍估都至少有10%....但講乜都假，如果一手都分唔到，升10倍都唔關你事，係咪？
報料電郵：[email protected]