新世界中國（917）對上一次見報係7月30號，股價到家陣只得9%進賬，繼續揸實，等食大茶飯。呢期北大人為免地方濫批地，再推出「新國八條」嘅土地緊縮政策，祖國有關部門已經預期，地價因此上漲50%。呢項措施提高咗新入門者門檻及成本，但對原本擁有龐大土儲嘅地產商，就百利而無一害。好似新中，家陣喺祖國控有1.5億平方呎土儲，係新政策大贏家。
再講，新中NAV6.2元，現價（3.26元）折讓47%，已經夠吸引，又因為新政策推出，齋計地價升值，新中都水漲船高。新中再秤後NAV去到7.8元，實際折讓58%，仲唔流口水？新中現價翻半番，去到4.89元，到時，NAV折讓仲有38%，相對中國海外（688）及合生創展（754），P/B閒閒哋講緊兩倍幾三倍水位，新中要向上爆，實情大把空間。
川河見調整要撲貨
川河（281）往績PE20樓上，啱啱公布06年度中期（6月止），純利倒退55%，唔多靚仔，但春江鴨識貨，已經郁郁槓。川河主銷上海物業，齋計今年6月底止，實收預售定金2.32億港銀，已經係集團05年度總收入嘅135倍，兼且會喺全年度業績反映到。
估計川河06年全年度純利係咁易上1億銀，PE大降到6倍。當炒番上10倍計，川河要見0.38元，現價（0.243元）潛在升幅50%樓上。川河短線有啲超買，但一見調整，好撲貨。
錢雋