想當年smartfortwo一出，歐洲鬼佬個個搶住買，幾年後嘅今日，廠方又有新搞作，之唔係呢部smartforfun囉。第一眼望埋去的確幾嚇人，但睇埋落去你可能會同我一樣開始對佢有少少好感，皆因佢比smartfortwo更好玩。唔好以為佢就咁將四個大轆裝上去咁簡單，查實每一個部份都做到一絲不苟，淨係要將4個直徑141cm嘅大轆裝上車軸同底盤上面已經唔容易，而且呢架迷你版大腳八仲特別配上一副來自Unimog嘅OM352直6引擎，容積有成5,675c.c.，再配上氣壓式避震、鋁管車架、可調校式懸掛，上高山落斜坡完全無問題，易操控又舒服，咁搞法，如果車廠真係推出市面，隨時打低傳統大腳八、爬山車都唔奇。記者：黃婉冰
