公戲私用：玩盡娛圈政界翻炒經典爆笑場面

有時，小記真係好想將鬼佬嘅頭顱劈開一半，研究吓點解大家對搞笑呢種表達技巧，跟我哋有咁大出入！對所謂美式笑話，個人並唔太欣賞，反而值得講吓，就係笑話背後嘅故事。今次介紹嘅《搞乜鬼終極奪命雜作》（簡稱SM4）都算幾有代表性。劇情每一個細節，佢唔單只撈晒近期荷李活大作嘅經典場面，更抵死係玩盡政客、藝人各種特點，冇劇情但笑餐飽，賤到出汁嗰隻！
記者：陳國輝

故事講述女主角仙蒂做咗保母照顧阿婆，無意中發現屋內有啲「污糟嘢」，更意想不到係竟然同外星人有關，愈玩愈大！《SM4》玩盡DVD包裝，今次另推出首批限量版《眼突突搞鬼DVD外盒》，由吹氣公仔Mary擔正做封面女郎，個眼球可以當玩具拎出嚟玩，真係唔知話有創意定係騎呢先啱！

■Menu都有真人Mary，原來係抄襲自《奪命狂呼》嗰種尖叫。

爆笑！總統當眾剝光豬

美國佬嘅諷刺搞笑本能，呢鋪仲踩過界玩政界！最令人難忘，就係總統布殊喺演講嗰陣，經常懶幽默向觀眾講笑話，有時仲會同台下高官玩遊戲，究竟佢喺度演講抑或做緊棟篤笑，簡直睇到?爆頭；不過，《SM4》將佢呢種伎倆玩得更誇張，故事講布殊為咗喺演講時引起觀眾注意，突然間佢剝晒光豬，除剩條底褲，最騎呢係班高官竟然跟埋去做，都唔知為乜！另外，電影仲出現過「少年拉登」，佢一支公衝上街諗住引爆炸彈，點知火機冇晒Gas跟着仲俾人捉咗，呢個結局梗係美國佬最恨見到㗎啦！
玩完政客都唔夠喉，仲玩埋娛圈藝人。當中必睇位一定係米高積遜出現嗰一幕，故事講太空侵略者殺到嚟地球，因此好多小朋友同父母失散咗，呢個時候，米高積遜突然喺後面行出嚟，仲扮個慈父Look話要照顧晒呢班兒童，如果有留意荷李活新聞，就知《SM4》明寸佢之前非禮兒童嗰單Case啦！

■美國白宮慘變光豬場？總統「布殊」更肆無忌憚行嚟行去。

■扮嘢嚟講，成套電影扮得最似肯定係米高積遜嗰幕！

■仲搵咗NBA巨星奧尼爾撐場，佢仲玩石頭射籃，依然唔入居多。

驚嚇！iPod變成外星人

話明「雜作」梗係乜事都有可能發生，最意想不到係外星人由地底爆上地面嗰一幕，入侵者竟然唔係百足咁多爪嘅UFO，而係triPod！唔使講都知，佢翻抄自蘋果電腦iPod，但最抵死係佢識得用巨型Handphone嚟壓死班人類，手段相當「殘忍」！電影仲唔少得香艷鏡頭，雖然唔算多，勝在精警搞笑，好似講個身材索爆嘅盲妹亂闖入咗法庭，以為係屋企廁所，仲無厘頭除剩件內衣當眾屙屎，好笑得嚟又有少少露肉。至於Bonus部份就稍為單調啲，內容都係製作花絮，訪問等例牌環節，幸好有啲已刪剪片段畀大家欣賞吓，否則覺得正片得89分鐘，喺荷李活電影嚟講，實在太短。