噚日講到，我一個黃金入球幫球隊升班，咁大功勞，原本都好應該俾硬個正選位我啦，但係教練又好嘢喎，佢知道天將降大任於斯人，必先勞其筋骨，於是乎搵多兩個勁人同我爭正選。嘩！有冇一隊波可以有成6個前鋒先？曼聯都係得嗰4個，教練想刺激我嘅鬥心吖嘛。
6個前鋒激發鬥志
咁就開正我嗰瓣啦，我最鍾意鬥嘞，尤其是同球證鬥呀，每一次球證吹雞，只要佢係吹罰我嗰隊，我都抵唔住頸㗎；一定埋去同佢死拗一番。啲球證呢，你唔哦佢，佢唔知自己唔啱㗎，雖然，我都冇一次見佢哋肯認自己錯。
雖然成隊有6個前鋒，但係今屆我仍然場場正選，無他嘅，好波兼……有啲運囉！對利物浦嗰球，我明明傳中，又會撻Q入咗；對維拉嗰球，連我個膝頭哥都曉入波，真係連我都服咗自己呀。
唔怕話你知，我差啲有份踢世界盃㗎，因為千里達查過我家宅，話我祖先有千里達血統。嘿！我梗唔制啦，我要保留呢個機會俾英格蘭㗎，我係韋斯咸嘅森莫亞呀！
馬啓仁
愈講愈有味道，堅持「槌仔」先係正路的球評家。