永利賭場開業，詹培忠贏200萬話要豪使$3,000食餐飽喎，查實佢都儍嘅，喺澳門想食餐飽，使鬼$3,000咩。跟我行過新口岸，包你喫到筍嘢，點筍法？聽住喇，2磅幾重超巨型燒豬肋骨唔使$100，分4啖先食得晒嘅大隻生蠔$50有找，認真抵食夾大件，留定肚喇唔該，因為呢餐肯定飲飽食醉呀。
記者：黃若茵
攝影：黃子偉
模特兒：Algie
燒豬肋骨$98
文哥：「豬肋骨有成2磅半至3磅重，好多肉食㗎。」肋骨用白酒、紅酒、雜香草醃1晚再焗，咬落勁入味，咪顧儀態，拎上手食喇喂。
定期推出新菜式
唔難估，睇餐牌就知「黃金海岸餐廳」主打海鮮，不過勢估唔到呢度竟然係澳門第一間提供生蠔嘅食肆，老闆Albert話：「一開始做西餐兼賣海鮮，賣生蠔我哋第一間呀，𠵱家啲人想食生蠔，自不然會諗起我哋。」見到雪櫃內大大隻生蠔，好吸引，我為食，即刻叫師傅撬隻我歎吓，果然好掂。大廚文哥話：「幫襯開嘅多數係熟客，嚟多幾次發覺無新菜式會悶親人，所以海鮮要定期創新煮法，畀多啲新意客人。」海鮮確係多選擇，不過我眼闊肚又闊，都係鍾情巨型豬肋骨同大大隻生蠔，食到捧住個肚，滿足。
餐廳佔兩個舖位，餐廳隔籬係酒吧，Albert話：「唔只啤酒，我哋仲供應200幾款白酒、紅酒、香檳、汽酒等，係澳門唯一一間WineBar。」昅昅，見到餐廳所在成條街都係食肆酒吧，仲有唔少露天座位，夜晚氣氛應該唔錯喎，「係呀，蒲得呢度嘅客都比較成熟，甚少劈酒鬧事，夜晚有氣氛得嚟仲好浪漫㗎。」
愛爾蘭生蠔每隻$42
撬開大大隻生蠔，入面勁多海水，每一啖都食到鹹鹹海水味，鮮呀。Algie要分4啖先食得晒，可想而知有幾大隻。
忌廉雜菌焗帶子$28
Jumbosize日本帶子肉質結實唔韌，用摩利菌、牛肚菌等雜菌撈芝士焗，香味好濃。
雜錦串燒2串$98
8吋長，有澳洲牛仔肉配紅酒汁或海鮮配檸檬牛油汁任擇，加埋野米飯，仲唔飽？
葡式凍蝦$68
文哥：「我落嘅葡國欖油味道比一般欖油重好多，可以突出大花蝦鮮味，加埋啲番茄粒同中國芫荽，係一流前菜。」
扒太平洋大蝦伴辣汁$150
文哥：「住家式葡國辣汁，好地道㗎。」辣汁入口味蕾叫辣，嗒真有啲啲番茄味，咬埋大大隻蝦，好鬼開胃喎。
睇埋裝修
搵食攻略
黃金海岸餐廳（853-752800）
地址：澳門新口岸孫逸仙大馬路1403號帝景苑大廈地下K-L舖
營業時間：1:00pm-1:30am（餐廳），1:00pm-4:00am（酒吧）
座位：100個
交通：碼頭乘的士約$16
人均消費：$100-$500
有着數：Leon信用卡簽賬有9折優惠
