講到甜品，科大3年級生LingLing立刻眼仔睩睩話︰「學校附近無糖水食，想食好嘅就一定要搵聰嫂。」聰嫂？莫非係學校食堂某位阿姐成日煲糖水畀同學仔食？「梗唔係喇，我講嘅係將軍澳嗰間『聰嫂私房甜品』呀。」LingLing鍾意食甜品，想當年入大學參加O'Camp，就係同組師兄師姐帶佢見識聰嫂嘅手勢。「由學校去『聰嫂私房甜品』都幾遠㗎，同同學夾錢搭的士出去食囉，廿幾蚊的士錢，儲夠5個同學仔，位位畀多$5蚊唔係好貴啫。」
每次幫襯，LingLing必叫榴槤做嘅甜品，同佢坐定定睇餐牌，佢款款都想食，最後叫到成枱都係︰「次次都係咁，心大心細乜都想食，Last實叫到成枱嘢。」聰嫂同我講︰「我哋嘅甜品全部用蒸餾水做，咁樣味道會清啲突出啲。」「唔怪得咁好味啦。」講吓講吓，4碗甜品食得七七八八，LingLing，小心食咁多一陣上堂搵周公呀。
記者：方綺君 攝影：何家亮
楊枝甘露（前）$20、榴槤水晶珠$25
楊枝甘露用雪糕、忌廉、鮮芒果同蒸餾水調製，味道果然清啲。榴槤水晶珠用蒸餾水、忌廉、脫脂奶同金枕頭打成，面鋪水晶珠，榴槤味好香。
鮮雜果水晶珠$28
台灣入口水晶珠同普通珍珠唔同，爽口似蟹子，加埋士多啤梨、芒果、奇異果、西瓜同香蕉，淋上用新鮮芒果肉打成嘅芒果汁，正到爆。
薑汁芒果豆腐花$22
蒸餾水、忌廉、脫脂奶打勻，加薑汁拌豆腐花食，面鋪水晶珠、芒果增加口感，入口好香薑汁味好香滑。
聰嫂私房甜品（27069955）
地址：將軍澳新都城第一期地下G28號舖