呢個世界，女追男真係隔重紗。好似電視台姐仔眼矇主動出擊追生麵，成日主動約對方陪佢做運動，咁生麵甩拖都有一段時間，dry咗咁耐，突然有個女仔咁主動送埋嚟，梗係食得唔好嘥啦，雖然呢位姐仔真正人品其實麻麻，但生麵𠵱家只係睇到姐仔好表面嘅嘢，所以已經入晒局，以生麵份人咁懵，邊度夠眼矇咁有城府呀！生麵同呢位姐仔拍拖，關仁真係要祝佢好運囉。
刀刀密謀為仔出力
咁多年嚟，電視阿姐刀刀無論喺事業、財富同名氣，一直比佢個歌手男友「男圓」高幾皮，為唔想男友自尊受損，刀刀其實好想利用自己同外界關係去幫男友一把。好似男圓最近密謀再喺樂壇展拳腳，推出個人大碟同喺紅館開演唱會，刀刀一心諗住出手幫助，借助自己嘅名氣，幫男友再打江山，點知男圓話唔想外界以為佢靠女友發達，一口拒絕。不過，刀刀明白呢個樂壇好現實，歌手單靠實力係唔夠，既然男友唔想佢明幫，佢惟有暗幫，靜雞雞打電話畀公仔箱領導人老友，叫佢嚟緊記住關照男圓，咁嘅女友真係唔話得！
姣精啞鈴醫院釣龜
火爆影帝「震震吓」同姣精啞鈴，近排俾狗仔隊影到佢哋喺派對親熱，仲擺咗上網任人睇，震震吓之前仲係咁爆粗話記者走去搞佢老婆問回應，大發老脾，不過牛唔飲水，又點㩒得牛頭低呢？啞鈴好鍾意四圍發姣係千真萬確，關仁聽聞佢話契爺係某名人醫院嘅高層，於是佢有一排得閒就去醫生休息室打躉，趁機向啲專科醫生放生電，睇吓吊唔吊到大魚，因為啞鈴曾講過好恨做醫生太太。關仁聽聞啲醫生見到佢都怕惹緋聞，又嫌佢cheap，避之則吉。
關仁