陳沛嘉戀愛證明
「呢張相係我同男友上年12月第一次一齊去ball影嘅相，我哋都覺得好有意義，因為呢張相係我哋公開戀情嘅證明，所以特別有紀念價值。而且身為公眾人物，行出嚟大方俾人認同要好大嘅膽量，但係我哋行出呢一步。至於平時我就鍾意影人，好似身邊朋友嘅相，因為咁先比較有感情，影死物好似冇咗個互動。」
手機相：與男友合照
林苑內有友犬
「我影咗同原子鏸隻狗仔嘅合照放喺部手機度，本身我屬狗，所以好鍾意狗，但喺香港又冇時間養，原子鏸成日會帶埋佢隻狗嚟拍戲，隻狗仔又好得意，原子鏸又教得好好，佢叫隻狗唔准食嘢，隻狗就真係唔食，好聽話，又成隻公仔咁，可以話係天下第一得意狗，所以我成日捉住隻狗同我合照囉。」
手機相：與原子鏸愛犬合照
吳雨霏話影就影
「我得閒就會幫隻狗仔影寫真，不過每次對好焦隻狗就會走咗去，有時要跟住佢走嚟走去先影到。平時我會用菲林機影相，之前試過用一部冇影相功能嘅電話，點知真係好唔方便，唔可以話影就影，加上𠵱家啲電話影相功能可以轉黑白相同特別效果，根本唔使用電腦做後期，結果舊嗰部用咗一排就換番有相機功能嘅電話。」
手機相：與愛犬合照
傅穎靚相太悶
「呢張相係我用電腦特殊功能自拍嘅，前前後後都影咗好多張，有啲好似壽星公、女鬼，總之張張都搞笑醜怪。以前我用電話自拍都係影靚女相，久而久之咪覺得好悶同冇新意，影呢樣古怪相會有估唔到嘅效果，我將其中一張壽星公相用嚟做MSN嘅相，點知身邊朋友話每次見到壽星公都諗起我。」
手機相：醜樣自拍照
梁漢文泰空獵奇
「呢張相係我去泰國拍《美女廚房》時影㗎，當時我哋坐船去小島，咁啱個天就好似一架UFO喺天降落嚟一樣，個天空好似中間穿咗個窿咁，而太陽就喺中間透出嚟，感覺真係好特別。其實平時我見到一啲好靚嘅景象，都會即刻影低留念，有時仲會set好啲位，專登拎啲嘢出嚟影，好似有時會影汽水罐，因為自己唔係專業攝影師，所以唔會特別買部相機嚟影。」
手機相：泰國的天空
徐天佑羨慕西人
「我部手機入邊放咗張畢彼特喺《搏擊會》嘅造型照，因為我覺得佢呢個造型好有型，一打開電話就睇到，跟住就會諗我幾時可以好似佢咁型呢？有時又會睇吓佢手臂操到咁弗，再睇吓自己，唔知幾時可以練到佢咁呢？其實我都幾鍾意用手機影啲外國明星劇照，因為冇乜機會見到佢哋。」
手機相：畢仔《搏擊會》造型照
許志安黑白懷舊
「呢張相係我近期最鍾意嘅一張，因為都隔咗一段時間冇出碟啦，所以之前同事畀咗我隻碟個封面相我睇，就即時影低佢，我覺得呢張封面相好靚。其實我一向都好鍾意黑白相，因為覺得好有mood，成個感覺好懷舊、好有feel。」
手機相：新碟封面
張敬軒當作參考
「呢張相係我之前去睇樓時影低，諗住可以畀屋企人同朋友睇，畀吓意見。其實電話相機功能對我嚟講幾有用，好似我想喺間房添置傢俬，通常會影低張相做資料，去傢俬店度襯色襯款。平時我又會同藝人朋友影相，不過影之前要得到佢哋同意，因為我間中會放喺個Blog度，但係影到唔靚嘅相梗係刪除，免得流傳開去。」
手機相：考慮租住的單位
採訪、攝影：馬建華、駱華齡、陳偉權、胡比
