黃貫中42歲，女友朱茵下月滿35歲，二人拍拖已踏入七年之癢，雖然他們如銅牆鐵壁般打風都打唔甩，然而若再不考慮生BB，朱茵都要變成高齡產婦了，阿Paul鬼馬騎騎笑：「都OK嘅。」好一個OK，但即是甚麼意思呢？「我都仲生到仔囉，哈哈！」
阿Paul笑說：「喺我心目中，佢仲係好細個，鍾意睇卡通片、玩公仔，點要求個細路女生細路仔？當然都希望有下一代，但唔可以夾硬嚟，係緣份。我哋私底下有默契，唔方便公開啦，唔想為交代而交代。」
阿Paul形容自己唔靚仔、細粒、窮鬼，但說到底朱茵是個可人兒，又經常到內地拍電視劇，問他怕不怕女朋友招惹狂蜂浪蝶，要跟人拗手瓜？他自信地說：「爭？好，嚟爭吖！睇你有幾本事。其實兩個人相處係基於信賴，大家一齊咁多年，唔會為唔喺香港而有問題，偶然幾日至見面，仲會爭取時間，你話乜都好啦，大家少見面會特別重視，我會盡量調配時間，唔夠瞓都希望去機場接佢，唔想搵助手，機係我接、行李我攞。」
「冇愛情即係餓死」
自言愛美人多於愛江山的阿Paul解釋：「男人會話：『有冇搞錯呀，女朋友吓吓接機，工作做嘢重要啲喎？』Sorry，唔係，女朋友重要多啲，喺嗰一刻係為我女朋友，唔係話將事業押後，愛美人多過江山……雖然都有可能，哈哈！盡量唔好行呢步，冇感情推動點玩音樂？
「成個世界係枯竭，一餓就死，冇愛情即係餓死，冇女人世界末日！冇女人，彈結他彈到咁勁，彈畀邊個聽呀？曬燈，曬畀邊個睇呀？練咁大隻畀我睇咩？愛情係一種推動力，開心好多㗎，世界末日都唔係好驚，因為身邊仲有另外一個人。」深信朱茵看罷這段愛的宣言，一定甜到漏。