向來只有人向賭王何鴻燊彎身，但兩個月前佢竟然要縮喺枱底，邊個有咁大威力？原來唔係人，而係大自然力量，即唔少港人上周四都經歷過嘅──地震。何鴻燊噚晚出席防癌會籌款晚會時，話兩個月前佢喺日本，有日喺一間酒店嘅50幾樓，「剛喺房行出嚟，點解郁得咁緊要，燈都郁埋……我就縮喺個枱底度。」
原來當時發生地震，佢話係黎克特制5.8級，「心都好定，喺咁易郁吓，無乜所謂……（地震時間幾長？）15分鐘，香港得一分鐘，濕濕碎。」噚晚有兩位女伴陪同賭王出席，一位喺三姨太陳婉珍，另一位係佢同三姨太所生嘅細女超蓮，超蓮今年15歲，長得亭亭玉立，個樣與同父異母嘅家姐超瓊愈嚟愈似。賭王仲爆好消息，話兒子猷龍太太嘅產期喺本月尾至下月初，就快又做阿爺，賭王梗係四萬咁口，話孫仔孫女都冇所謂。