下月18日，黃貫中於紅館舉行僅此一場的「黃貫中香港演唱會2006──狂人習作之音樂篇」，這是他事隔四年後，第二次再開個人紅館騷。阿Paul表現得很興奮，因為他可以盡情放肆，讓全港rock友齊集瘋狂一晚。
阿Paul說：「難得係我話事做監製，有操控能力，對rockfans嚟講係好消息，所以好多謝主辦單位東亞娛樂畀我放肆──搵一個鼓手做音樂總監，你會想像到個鼓大晒。今次演唱會用英文講啦：thisisjustrockandroll。我好有信心會好好玩，會震到你嘔，所有嘢從音樂出發。」
結他汗水當歌衫
本地歌手開騷離不開玩機關、跳火辣舞、穿最少布的衫或穿名貴舞衣，阿Paul謂適當的視覺娛樂是可以的，但別本末倒置，他說：「音樂正唔正、歌唱得好唔好係最重要，大家睇馬騮戲，不停換衫，搞到鬼五馬六冇意思，呢啲唔係我希望嘅演唱會，亦唔係我嘅嘢。
「結他係我件衫，汗水係我件衫，畀啲乜嘢衫我着都係一樣，彈得好、唱得好仲有型。我唔會有排舞老師，唔使伴舞，唔使機關，人哋有嘅我都唔需要，但唔使擔心，我會自動波，我得一場，會係一個搖滾演唱會。」