大曾曾慶紅喺北京接見自由黨同民建聯，對田少及馬力曉以大義，叫佢哋唔好搞亂煲呔個檔之後，就繼續部署選委會嘅工作。
八方聽聞，喺兩黨上京前，主管港澳工作嘅單位要員，都齊集北京聽滙報同訓示，首先統一思想係共產黨嘅一貫做法。會上當然由中聯辦同港澳辦打頭陣，重點向領導分析形勢。
講開中聯辦同港澳辦，兩個專責香港問題嘅對口單位，呢幾年都冇乜人事變動。港澳辦自從魯平退下，廖暉接棒，一下子就好幾年，廖暉成日話要退，轉去做政協副主席，不理實務，始終走唔甩。而佢位第二把手陳佐洱更係長春樹，由基本法起草一直至今，都由佢做發言人。
一問之下，才知唔單只港澳辦，中聯辦都一樣，君不見，人稱「老王」嘅王鳳超嚟咗香港超過七年有多，年年都話佢夠鐘要返祖家，但係佢就坐着不用走，日前羅鷹石出殯，佢仲打住黑呔代表中央去慰問，精神唔知幾好。
最終應該放手
至於佢嘅頂頭高祀仁，本來2003年對反23條上街人數評估大失誤，應該下台謝罪，但係後來都冇事。
原來胡溫上場後，覺得香港問題雖不及內地省市大，卻十分複雜敏感，一個不留神，成為國際頭條新聞，為安全計，就留住熟悉香港事務嘅原來崗位，由佢哋繼續負責處理香港工作。
八方覺得中方咁諗好正常，因為陳佐洱同王鳳超真的非常明白香港運作，可以講得係滾瓜爛熟，成本香港字典，唯一問題係太熟悉就欠缺創作性，所以香港問題永遠似走入死胡同出不來了，如果胡溫膽大，選完第三屆特首、捧咗煲呔上位之後，就係時候畀廖暉退，讓陳佐洱、王鳳超升上神枱當顧問，由年輕人接班，睇吓喺香港問題上能否有突破，打出一條生路。當然，北京應承過讓港人治港，就應履行承諾，最終放手畀香港人自己處理香港事務。