「佢處理完公事就返嚟」
傅明憲死撐老公冇失蹤

香港愛護動物協會前晚喺金鐘港麗酒店舉行85周年慈善晚宴，陳見飛、陳沛嘉同男友彭文堅都有出席。海域集團同海域化工兩間上市公司爆煲兼清盤之後，身為集團主席、傅明憲老公葉劍波一直冇露面。不過身為愛護動物協會會長嘅傅明憲，依然盛裝撐場，順理成章成為焦點。

有備而戰

傅明憲同在場記者介紹佢嘅partner，就係年僅12歲嘅愛犬比目魚醫生，當問佢真正partner、即係佢老公𠵱家身在何處時，傅明憲冇正面回應，只係話：「佢去咗外地公幹，處理完公事就會返。」
早排有報道話傅明憲喺老公失蹤後，即搭上26歲嘅莊氏大少莊家彬，問佢同老公嘅感情狀況，佢登時反問：「點解咁問？」後問佢有冇追求者，佢顯得有備而戰咁話：「個別嘅嘢我唔會回應。」再問佢有冇關心老公嘅公事，佢就話：「公司嘅嘢我唔熟，我都係做番慈善嘅嘢。」
有報道話傅明憲將住緊嘅富豪海灣放盤，並按樓套現，有指佢經濟出現問題，傅明憲都係嗰句，話唔會就個別周刊嘅嘢回應，總之𠵱家只專心慈善事業。至於問佢身上服裝品牌價錢同埋首飾行頭，佢都避而不談。