打魚？有自唔在攞苦嚟辛喎，係㗎；無魚穫咪好戇居，都係㗎。坐大飛出西貢海域，吹住海風，撒網，收網，一身大汗換嚟兩條──魚毛，勝在辛苦得嚟好好玩，戇居得嚟又好有滿足感。放假喎，仲上網打機行街Shopping？健康啲，扮番一Day半Day水上人家過癮吓好過喇。
記者：蘇振鵬
攝影：黃子偉
模特兒：Wiyona、HiRai、Monqiue
靚女變癲雞
出海地點西沙水上活動中心，出發前玩吓搭橋、拋圈同運水等Team-building遊戲當熱身。玩完一輪濕身活動，係時候出海！咪住，去邊先？會唔會去咗大陸海岸㗎？負責人Anthony話：「呢個海灣地圖無名喎。」吓？「啲人慣叫西沙灣。」哦，原來駛去活動中心對出海岸啫。講講吓，有個漁夫好似做緊大買賣咁坐住大飛一支箭衝埋嚟，一男三女上船，大飛又一支箭咁衝出海，船頭微微翹起，船身20度傾斜。嘩，出乎意料地咁爽，海風吹到我面都歪，一眾靚女要不停保護自己髮型，狂向海大叫：「我變晒癲雞喇！」興奮指數直線上升。
引魚仔入局
大飛去到海中央開始減緩去勢，漁夫拎出附有一個個橙色手把嘅魚網，開始教路：「第一步落網，一隻手拎住一大抽網，另一隻手拎住橙色手把，逐格逐格咁放網落海，唔好急，要撒得均勻，之後就同魚玩遊戲。」玩遊戲？「網落到咁上下，我會將大飛駛番近少少岸，之後將個大鐵鎚擲落海，收番，再擲。」咁做為乜？「嚇魚囉，魚受驚就會向海中心游，到時會游番入先前我哋撒嘅網，成個過程都係一個局。」又盞鬼喎！
魚穫少得啖笑
時間關係，魚穫只有兩條魚毛──一條黃魚同一條鱲仔，算係咁啦。漁夫話：「除咗黃魚同鱲仔，西沙灣網到嘅多數係泥鯭、三鬚，種類都唔少。」返到岸，大家仲未夠皮，於是整多Round水上單車先收手。辛苦搵嚟自在食，最後節目梗係BBQ，Anthony又話：「附近水質OK，網番嚟嘅魚絕對食得落肚，洗亁淨加少少調味料，用錫紙包住嚟煨就正喇。」唔，味道果然唔錯，唔錯在自己捉番嚟零舍有滿足感。
好玩遊戲
搭橋
大家企喺木箱，用木板搭橋，再手拉手至拎到插喺沙堆上面嘅花為止，十分考驗合作性。
拋圈
邊個衰，就屈佢戴住個裝有木棒嘅頭盔，做人肉柱被人玩拋圈，考眼界考手力，過癮。
運水
分兩批人，一批負責運水，蠱惑水桶一路行一路漏水，搞鬼；另一批人負責㩒實大膠桶上面嘅窿防漏水，辛苦到爆。
水上單車
靚女們話好好玩，不過話踩得耐小腿會變粗喎。
跟團去
西沙水上活動中心（27928307）
地址：西貢沙下9號地下（海灣酒店舊址側）
開放時間：周一至日10:00am-7:00pm
費用：每位$118，包Team-building遊戲或出海網魚二揀一、BBQ連食物包，報名人數最少12名
交通：寶琳地鐵站乘12號專線小巴至西貢市中心總站下車，下車後沿海傍廣場路，經泳池、學校、停車場向大網仔方向步行約10分鐘到達
網址： http://www.sai-sha.com