今次訪問在周嘉玲家中進行，她的家更是首度曝光，甫進家門，感覺十分摩登，全屋以紅、白和啡色為主調，非常簡潔，完全反映出兩人的獨特品味，她說：「成間屋係我老公設計，全屋混合咗摩登同懷舊元素，客廳以簡潔現代設計為主，飯廳嘅設計就有50、60年代嘅懷舊感覺，書櫃放滿設計書籍，全間屋嘅設計係由佢話事，唔少傢俬都係特別訂做嘅，花咗兩個月先裝修好。」
老公花心機
周嘉玲續說：「老公為間屋花咗唔少心血，其實佢有自己嘅設計公司，幫商舖同餐廳做design，中環唔少名店係佢設計嘅，十幾年前佢嚟香港，喺蘭桂坊做bartender到今日擁有設計公司，我覺得佢真係好叻。」