做慣豪宅買賣嘅代理，成日都同蘭西呻，話好多有錢佬信風水信到十足，風水佬講一句好過佢哋講一百句，有時都好冇癮，甚至生意都做唔成。不過，美聯陳靜雯就好好彩，撞正個客嘅風水師傅話間屋好旺佢，帶挈佢促成單生意。
個單位係九龍塘碧華花園2座中層B室，1742呎，連車位，呎價7463蚊，師傅話單位望學校球場，對業主運程相當有利，買家即時二話不說，以1300萬扑槌入市。
市場仲有另外兩單豪宅成交，不過就唔關風水事，純粹買家心頭好。世紀21廖振雄話，西貢銀線灣銀泉臺一幢洋房，實用面積2057呎，成交價1950萬，呎價9480蚊。灣仔會景閣中層19室，1772呎，以1618萬成交，呎價9131蚊；利嘉閣區振輝透露，原業主6年間賺238萬。
電郵地址：[email protected]