英超開季至今，以樸茨茅夫最能予人驚喜。呢隊波上屆幾經辛苦先至成功護級，今季喺人腳大幅變動下，頭4場居然錄得3勝1和、兼不失1球佳績，暫列聯賽榜次席，真係冇乜人估得到。不過話說回來，樸茨茅夫開「咧」到𠵱家，仲未遇上有實力對手，究竟係龍係蛇？仍然有待觀察。
雖然樸茨茅夫現時保持零失球，但喺我心目中，季初後防踢得最好嘅球隊係阿士東維拉。自從由星級領隊奧尼爾執教之後，維拉防線對比起上屆有明顯改善，每位防守球員，都極為集中精神，過往常犯大意錯誤嘅毛病，因此而銳減；中堅列治維進步神速，表現相當穩定，包位又準繩，功不可沒。
奧尼爾大師級風範
能夠令維拉成隊波脫胎換骨，足以證明奧尼爾嘅功力深厚。其中作客阿仙奴一仗，維拉以快速回防踢法，收緊主隊進攻空間，戰術成功之同時，發揮亦十分理想，阿仙奴能夠執番1分，其實應該偷笑。
今晚屈福特主場，肯定會以一貫硬淨打法招呼維拉。好可惜，全隊僅得右中場楊格稍為有點突破能力，其他球員質素麻麻，進攻更加係單調無板斧，今場難望有機會開齋。維拉坐和望贏，平手盤一於咪走雞！
今日繼續推介新特蘭，今晚對住剛剛輸俾包尾大幡侯城嘅李斯特城，主W無得走！
有線球彩台主持強尼
電郵：[email protected]
phone波熱線：1831678