演藝人岑建勳指雜誌行文粗鄙，要求立法禁止，譬如報刊雜誌常用一個「摷」字，就令家長好為難。不少報刊用字，十分粗鄙，係事實，抵鬧。但搞到要立法就唔好嘞，一啲人郁吓就叫政府立法，規管，將自由雙手送回畀啲官府，好唔掂，我哋唔想香港演變成為新加坡甚至中國大陸，等政府乜都干預，乜都監管也。
今人文學修養差，比上一輩編輯相距甚遠。今年七十一歲嘅韓公，四十年前（三十一歲）為《明報》下新聞標題：「打炮二十一響，送御妹過海」（見《經濟日報》九月十二日專題報道），御妹就係瑪嘉烈公主，打炮就係鳴炮，瑪嘉烈公主在一九六六年三月一日訪港，喺啓德機場乘港督遊艇「慕蓮夫人」號過海到皇后碼頭，上船後，皇家海軍鳴炮二十一響恭送公主過海。韓公呢條題完全描述正確，但「打炮」在廣東話中，別有意思，韓公故意一語雙關，令到讀者笑騎騎。當時嘅「華民政務司」華人官員就睇到面黑黑，韓公卒之後來辭職，離開《明報》。
「打炮二十一響」之標題，我哋在飯局久不久就會向韓公提起，韓公引以為得意傑作。今日之年輕編輯，邊有咁好字墨吖，故此時常用啲俗不可耐，難登大雅之堂嘅粗鄙字眼。以事論事，各位等到立法會重開之後，睇有線電視直播立法會會議，幾位街頭戰士型嘅議員，吐詞用字亦十分粗（以議會水平而論），有失尊貴身份。寫稿之時，聽到陳婉嫻接受港台吳志森訪問，一連講咗幾次「片」字，（例：同曾特首片），都唔係幾好聽啦。
家長對於子女用詞，不妨教多啲。例如顧問Ｓ位千金已經做咗部門經理，食飯時佢會講：「昨晚我同班𡃁一齊蒲吧。」顧問Ｓ立即對女兒講：「唔好咁講，斯文啲。」於是女兒改為講：「昨晚我同班下屬一齊去酒吧飲酒。」然後女兒回應一句：「個個年輕人都係咁講說話嘅啦，你管得幾多。」顧問Ｓ話：「其他人點講，我理唔到，你係我個女，喺屋企講說話就要檢點啲。」英國人說話，可反映階級身份，香港人已變成「無產階級」，大學碩士與市井之徒一樣講：「同班𡃁去蒲吧」，冇計。