新腦勢:TabletPC變12"畫板猜猜畫畫冧女神

新腦勢:TabletPC變12"畫板猜猜畫畫冧女神

返工對住部腦,就算放工後都用緊手提電腦覆電郵,一味打鍵盤嘅刻板生活,你有冇諗過改變?好似大文,佢好識利用手上部東芝PortegeM400平板電腦(TabletPC)嚟自得其樂,唔想打字可以寫,連寫字都唔想可以畫公仔傳情;佢就寫吓畫吓,仲結識咗生命中第二個最重要嘅女人!
編導︰陸俊雄
攝影︰何家亮
演出︰大文、小憂
場地提供︰貴族浪人咖啡屋(35281333)

手提電腦愛的故事

我怕羞仔大文,鍾意去Cafe覆電郵。咪以為好悶,用東芝M400平板電腦又寫又畫,不知幾過癮,啲客好Buy我啲真迹㖭。點知有日畀侍應小憂倒瀉水喺我部腦上,我嘅下半生就改變過嚟。
記得第一次交談我話︰「唔緊要!」事關鍵盤係生活防水,的確傷唔入肉。另一次佢掛住拉櫈,差啲撞跌我部腦,喺佢連番道歉後,我哋居然可以拉開話題,傾個不停。我不時同佢喺TabletPC上玩「打井」、畫公仔,開心時間過得好快,慢慢我仲發現自己鍾意咗佢!有日我終於拎出勇氣,喺芒上寫上:「幾點收工?」仲畫埋支花表明心意㖭。估唔到我倆嘅愛情故事,就係因為呢支「手畫花」而開始。起初冇諗過,自己成條怕羞草咁會識到女仔,點知小憂講返我聽︰「其實你第一次嚟Cafe時,我已經留意你喇,儍人﹗」原來現代愛情故事,好多時係欠男方主動開聲先啫……老實講,邊有男女平等㗎!

■由侍應倒瀉水開始第一次交談。

■撞跌大文部TabletPC作第二度接觸。

■八卦老闆好奇心強,想知佢哋畫緊乜。

■經兩次撞板後,兩人反而打破隔膜,仲不時玩吓打井㖭。

■最後怕羞仔大膽用手寫傳情示愛。

■每日用畫板畫花攻勢,卒之贏得美人歸!

防水防撞扭得安全

覓真愛固然重要,不過買平板電腦知佢有乜Function同樣緊要;東芝呢部PortegeM400個芒任扭唔嬲唔在講,內建嘅安全保護系統,更係賣點所在!先係硬碟保護技術,用家行開行埋好易震到部腦,有咗佢就算遇到輕微碰撞都唔怕。另外M400鍵盤係生活防水設計,你小心啫,但難免其他人倒瀉湯水落你部腦嘅鍵盤上。鍵盤下有保護層,可減低資料被意外損壞嘅機會。
M400除咗保護性強,喺資料保安上一樣好得。設有指紋辨識系統,認指紋開機杜絕資料外洩,想行開去小解,老婆都偷睇唔到你打緊電郵畀咩人。想再密實啲,仲有東芝獨有SD加密系統,以SD卡代替手打密碼登入開機,直頭當保險匙咁用。

■用M400畫公仔、手寫電郵都可以好過癮。

■生活防水鍵盤設計,真係意外都有Take2。

■寫得畫得,多功能集一身,38.9mm厚度絕對可以接受。

PROFILE

處理器︰IntelCoreDuoT2400
硬碟︰80GB
記憶體︰1GBDDR2
顯示屏︰12"SXGA+
光碟機︰SuperMultiDrive
體積︰295×249×38.9mm
重量︰2.038kg
查詢︰其士(29533555)

$19,980