侍仔：茶餐廳近排生意愈嚟愈差，世界盃嗰陣已經蝕唔少，𠵱家隔籬間老M又賣埋飯，愈嚟愈難做。
招積域：你老細冇諗計咩？
菠蘿文：再唔係好似其他老細咁，自己一間舖，之後就係咁靠店舖買賣搵錢。得一間總店，死就真係死㗎啦，你話晒係股東之一，出吓計仔。
侍仔：其實我哋都仲有一個舖位放租俾人，不如收番佢，將呢間租俾人啦，呢間舖值租好多。
菠蘿文：你真係學咗熱刺老細咁諗，買咗溫布萊球場之後，每當有盃賽同國際賽，就租番俾英格蘭足總收錢呀？
招積域：如果成功就發達囉，溫布萊變做自己主場，場場波有80,000人入場，又收英格蘭足總租用費，又有電視轉播費，收多幾瓣錢。
侍仔：買舖都要問銀行借錢啦，溫布萊應該值唔少啩，熱刺就咁要負巨債，我覺得唔抵囉，冇人擔保場場都爆滿，有一次半次得4、5萬人都難睇啦。營運唔使錢嘅，場地保養又係免費㗎？
好過賣盤或注資
菠蘿文：熱刺既然想振作一番，就要冒吓險。我覺得呢個方法比曼聯、車仔同韋咸好，起碼算係自力更生，齋賣盤或俾人注資。
招積域：唔見林伯嘅？佢應該好多偉論發表啦，溫布萊成百幾年歷史。
侍仔：佢屋企人話佢北上玩幾日，佢臨走前話撐硬國米今晚痛宰森多利亞，話要將歐冠盃悶氣發洩出嚟。
菠蘿文：咁即係捧對家嘅時候啦！
高洛文