下星期一終於開幕嘅昂坪360，之前連串事故俾人插到暈，連開幕儀式都唔敢大搞，只係切燒豬、拜吓神，兩位關事嘅局長大蛇葉同冬冬，齊齊閃得就閃，無一個肯蒲頭。吊車營辦商Skyrail早幾日認衰，話當日主禮嘉賓只有常務董事高德偉同地鐵工程總監柏立恒兩個鬼佬。
特區政府可能事後都覺，咁樣同昂坪360劃清界線似乎太過揚，噚日嗱嗱臨補鑊，安排旅遊事務專員區璟智開幕日去撐場，免得俾人話一個政府代表都冇。其實唔怪得政府對Skyrail咁不滿，皆因之前試車無端端有幾百人困喺半空，萬一到時有局長高官半天吊，豈非成為國際笑話？最難委都係區小姐，去完廸士尼樂園一周年慶祝活動，跟住又接壇吊車蘇州屎，呢份旅遊專員嘅工作，真係唔易撈。
Skyrail噚日公布，開幕日已經賣咗超過1,000張飛，之後嘅日子亦有成3,500幾人預訂，佢哋對銷情好滿意喎！