睇咗成個月英超，車仔、曼聯同愛華頓3隊暫時最幫到各位球迷！而講到令小弟眼前一亮嘅球隊只有一隊，就係愛華頓嘞。
喺英超開波之前，小弟已經知道愛華頓呢隊波係一年好一年差，而差嘅原因係歐洲賽事，因為兵源不足分身乏術，影響咗英超成績。今季愛華頓並無兩面戰線，又有安祖莊臣（AJ）呢位前鋒加盟，有波就大腳傳畀AJ，佢自己可以搵食；所以愛華頓今季嘅鋒力，我絕不擔心，更期待佢哋有機會衝擊一下榜首位置。今晚對住韋根，我絕對有信心愛華頓可以贏波，「主客和」W有1.7倍，實在好吸引！
利記係「劏車」高手
明晚，英超4大強隊捉對廝殺，我隊車仔對住利物浦，雖然紅軍傷兵一大批，作戰水準又唔夠穩定，但利記係「劏車」高手，有格食格味道，令小弟十分擔心！但係，車仔只要打番對雲達不來梅呢場波嘅水準，艾辛好似做咗「自由人」一樣，滿場飛。睇嚟摩連奴已經初步可令艾辛、林柏特同波歷克清楚分工，解決到中場結構問題，我相信車仔今場一定可以贏波！
至於曼聯對阿仙奴，我就覺得好奇怪，曼聯憑乜嘢可以咁熱，正路兩隊係五五波，唔通就係因為曼聯開賽到𠵱家都係全勝？雖然阿仙奴喺聯賽仲未打開勝利之門，但係歐冠盃作客贏到漢堡，狀態似乎正係回升當中，曼聯冇咁易贏呢個老對手！
雷霆881商業一台《球迷集中贏》主持周鵬
電郵：[email protected]