打電話畀相熟嶺南中文系同學仔Colour，問佢學校附近有無食肆好介紹，Colour好頭痛咁答︰「無喎，最近係隔籬富泰村，不過食嚟食去都係得間茶餐廳，無乜特別喎。」唔係咁慘嘛？再諗真啲？「咦！有一間，『泰味村』！係就係遠少少，由學校行過去要15分鐘左右，不過真係有好多嶺南同學仔捧場。」
「泰味村」位於新墟村輕鐵站側邊，位置唔算偏僻，入舖掟個Round，發覺有室內座位兼露天雅座，環境幾唔錯。負責人Jackie話︰「我哋開舖9年，夜晚經常有好多嶺南同學仔過嚟食飯，好多仲係Exchange㖭。」間舖下晝5點先正式營業，所以Colour同班同學多數放咗學先嚟開餐︰「鍾意佢有個半露天位置，返完一日學可以吸吓新鮮空氣，唞一唞。」嶺南學生多數住宿舍，食飽飯行路返宿舍，咪當做運動囉。
記者︰方綺君
攝影︰何家亮
貢品黃油蝦$168
以前係泰皇先有得食，緬甸多膏大蝦開邊拖油備用，炒成金黃色嘅蝦膏多到遮晒啲肉，撈飯最正。
咖喱焗青口$58
每碟9隻，焗青口嘅咖喱汁少辣，加椰汁非常幼滑香濃，放入口隻隻青口啖啖肉，好有嚼勁。
香脆釀飯焦$48
卜卜脆，食嗰陣記得點特製醬料，醬料用椰汁、肉粒、蝦等材料調製，微辣，好香口勁受歡迎。
泰味村（24512881）
地址：屯門新墟村第一臺1至3號地下